Comunicadu nr 01/2022

Cun su comunicadu de imprenta chi sighit s’assòtziu culturale “Acadèmia de su Sardu”, dae annos impinniada in s’amparu, abaloramentu e afortigu de s’impreu de sa limba sarda faeddada e iscrita, PEDIT a sos senadores de sa Repùbrica italiana, e pruscheàteru a sos senadores elèzidos in Sardìnnia de fàghere de totu pro chi sos progetos de leze frimos in sas Cumissiones Afàres costitussionales e Istranzos de su Senadu benzan luego leados in arrejonu in su Senadu matessi pro chi si potat lòmpere, prima de agabbare sa legislatura, a sa ratìfica de sa “Carta Europea de sas limbas de minorias e regionales” de su 1992. 

“Acadèmia de su Sardu” est de su parre chi cust’istentu mannu sumadu dae s’Itàlia, pro su chi pertocat tale ratìfica, no apat iscusa peruna. Aende in cunsideru chi sa mazoria de sas limbas regionales chi sun a manu de intro de sa Repùbrica arriscan de isparire intro de sa fine de su sèculu XXI, diat èssere profetosu chi s’Istadu bi ponzat manu e fatat de totu pro pònnere fine a cust’istentu grae, pro chi non sighemus a pèrdere custa prenda culturale imateriale istòrica de balore mannu pro sa Repùbrica matessi.

“Acadèmia de su Sardu” cun referimentu a sa limba sarda e duncas a totu sa comunidade sardòfona chi ch’est in Sardìnnia, chi s’istimat potat sumare assunessi a unu millione e dughentos-chimbantamiza pessones, est de su parre chi siat bènnida s’ora chi s’amparu e s’afortigu de sa matessi meritet luego de èssere posta a su matessi importu de sas àteras minorias regionales cale sas minorias germanòfonas, francòfonas e islavas chi sun istoricamente a manu de intro de sa Repùbrica etotu. Isperamus duncas, cantu prima, s’aplicassione cumprida de s’art. 6 de sa carta costitussionale italiana. 

Congruimus duncas mandende adenanti una pedidura a totu sos senadores, mescamente a sos senadores sardos, francu su colore polìticu, pro chi s’impìnnien e àere unu resultadu istòricu intro de custa legislatura matessi, agabbende de gai cust’istentu chi no faghet prus a l’aguantare.

PAULI (CA), su 2 de maju de su 2022

S’assòtziu culturale 
Acadèmia de su Sardu

Leave a comment

In response to:

COMUNICADU DE “ACADÈMIA DE SU SARDU” PRO CHI SI PONZAT APRETU PRO SA DISCUSSIONE IN PARLAMENTU SUSU SOS PDL CHI PERTOCAN SA RATÌFICA DE SA CARTA EUROPEA DE SAS LIMBAS DE MINORIA E REGIONALES.

Your email address will not be published. Required fields are marked *

*

Come desideri visualizzare il sito web ?

Comente lu cheres bìdere su zassu web?