COMUNICADU DE «ACADÈMIA DE SU SARDU» PRO APRETARE SU DIBÀTIDU IN PARLAMENTU PRO SA RATÌFICA DE SA CARTA EUROPEA DE SAS LIMBAS DE MINORIA E REGIONALES.

Comunicadu 02/2022

Cun custu comunicadu de imprenta su sòtziu culturale «Acadèmia de su Sardu», impinniadu dae annos in s’amparu, avaloramentu e afortimentu de s’impreu de sa limba sarda faeddada e iscrita, PEDIT a sos deputados e senadores de sa Repùbrica italiana, elìgidos in Sardìnnia, de fàghere a manera de sighire su dibàtidu pro sa ratìfica de sa «Carta europea de sas limbas minoritàrias e regionales» de su 1992.

«Acadèmia de su Sardu» est de s’abisu chi s’istentu mannu de s’Itàlia in sa ratìfica de sa Carta no potat tènnere prus iscuja peruna. Aguantadu in cunsideru ca sa majoria de sas limbas regionales chi sun intro de sas làcanas de sa Repùbrica arriscan de iscumpàrrere innanti de s’agabbu de su sèculu XXI°, diat èssere de profetu chi s’Istadu ponzat remèdiu a custu istentu grae meda, ca si nono si diat pèrdere totu  custa prenda culturale e istòrica manna de sa Repùbrica matessi. 

«Acadèmia de su Sardu» cun fentomu a sa limba sarda e duncas a totu sa comunidade sardòfona de Sardìnnia, chi contat assunessi unu millione e dughentas-chimbantamiza persones, est de s’abisu chi su gradu de amparu e afortimentu de custa limba merescat luego de èssere artzadu a su matessi gradu de sas àteras minorias regionales comente sutzedet pro cussas germanòfonas, francòfonas e islavas chi bi sun istoricamente intro de sas làcanas de sa Repùbrica etotu. Isperamus tando chi luego si potat lòmpere a aplicare a manera cumprida s’art. 6 de sa carta italiana. 

Tancamus duncas custu comunicadu pedinde a totu sos parlamentares sardos, de calesisiat partidu e ideologia polìtica, de lòmpere a otènnere unu risurtadu istòricu intro de custa leisladura etotu, fatende agabbare pro sèmpere un’ istentu malu chi no faghet prus a apoderare.

PAULI (CA), 26. 10.2022

Su sòtziu culturale
Acadèmia de su Sardu