Carta

CARTA

Carta de su Sòtziu

Art. 1 Lùmene, Tempus de atividade e Domo


1 Amus cuncordadu, ponende in fatu a sa leze de s’11 de austu 1991 n. 266 e a sa leze rezonale de su 13 de cabidanni n. 39, unu Sòtziu chi li naran Acadèmia de su Sardu onlus (dae como in susu Acadèmia).
2 Su Sòtziu no at acabbu;
3 Tenet domo in Pauli (CA), bia Punta Sèbera, 10.
4 Podet abberrer domos in àteros logos, mantenende semper su lùmene de Acadèmia de su Sardu onlus.

Art. 2 Sinnu e ditzu


1 Pro sinnu ufissiale s’ Acadèmia tenet duas mesu carotas; a manca sa de sos mamuthones, in colore nieddu, a limba ruja e a mucadore biaitu a rias biancas istrintas; a manu dereta sa de su componidori, in colore craru, a limba e laras rujas e a
mucadore biancu cun una ria ruja istrinta.
2 Ditzu de s’Acadèmia est:
de su pagu, pagheddu
dae su pagu si faghet su meda.
3 A su sinnu de sos c. s. 1 e 2 de su presente art. s’acostat unu logo cumerciale fatu ispertende a nou in crae moderna e cun prus pagos piessìnnios e inditos de su c. 1. 1.
4 Su logo cumerciale si podet acostare o podet mudare su sinnu ufissiale in sas pubricassiones de sos social media e in àteros bandos pùbricos chi poden cumbinare.

5 In sos atòbios solennes e in tzirimònias ufissiales si depet a malaoza impreare su sinnu ufissiale de sos c.s. 1 e 2 de s’art. presente, casu mai acostadu dae su logo cumerciale de su c. 3 de s’art. presente.

Art. 3 Iscopu, finalidade e òbera de s’Acadèmia


1 S’iscopu de s’Acadèmia est de fagher òbera de bolontariadu in totu su chi pertocat s’istùdiu e sa chirca de sa Limba sarda, pro sa defesa, s’ispinta, sa connoschèntzia e s’importàntzia sua, ponende a triballare su bonu totu sos assotziados, donzunu su chi podet, chene paga peruna.
2 Tenende in mente:
chi pro s’Acadèmia sa Limba sarda est una limba a duas (macro)bariedades diatòpicas (diasistemas sìncheros etotu) e literàrias, su Campidanesu e su Logudoresu, chi tenen, e depen tenner, sa matessi dinnidade e duncas dae como innantis si naran Lìmba sarda o sardu, pro calesisiat chistione chi las pertocat una e àtera
b) chi s’Acadèmia cumprendet e amitit chi sos àteros bator limbazos de Sardinna, s’aligheresu, su gadduresu, su tabarchinu e su tataresu, sun prendas de importu pro totu sa cultura sarda; sas finalidades pessighidas dae s’Acadèmia, chene chircare balanzu perunu, deretu o trabessu chi siat, e solu pro su bene de totu sos Sardos, de fagher puru triballande paris o acordàndesi cun s’Istadu, sa Regione sarda, s’Unione Europea, sas Universidades, cun àteros Entes pùbricos e privados e cun àteros Sòtzios chi pessighin sas matessi finalidades, sun:

2.1 de ispingher a fagher istùdios sientìficos chi pertocan a onzi ala de sa Limba sarda
2.2 de bogare a pizu, de proponner e de fagher onzi imbentu chi serbit a ponner su sardu impare cun sas àteras limbas natzionales, cumente a narrer:
a) unu standard de sa Limba sarda cun duas normas iscritas e chistionadas (sa norma de su Campidanesu e sa norma de su Logudoresu);
b) s’ Ufìtziu Natzionale de sa Limba Sarda, postu pro dare totue, puru cun apòsitos cursos de limba, su standard a duas normas, (lìt. a de custu c. 2.2);
c) s’Ufìtziu pro su Tzertificadu de su Sardu standard, (lìt. a de custu c. 2.2);
d) s’ Atlante Linguìsticu Sardu;
e) sos Ditzionàrios de biddas e bighinados e su Ditzionàriu Mannu de sa Limba Sarda;

f) libros in su standard a duas normas, (lìt. a de custu c. 2.2), de ponner in chistiones de didàtica, de leze, de crèsia, de ufìtzios, de informatzione;
2.3 de contipizare pro promover su deritu a istùdiare sa Limba sarda programande e cuncordande in sas biddas prus mannas de Sardinna cursos de làurea in sardìstica, cumente rechedet pro cuncordare mastros de Limba e literadura sarda de poder ponner in sa graduatòria pro intrare de ruolu in s’iscola pùbrica;
2.4 de fagher a modu chi radios, TVs e àteros mass media de Entes pùbricos (cumente pro narrer sa RAI) e privados, cuncorden e manden programas in Limba sarda;
2.5 de fagher recussu de leze donzi borta chi apètigan, pro su chi pertocat sa Limba e sa Cultura sarda, Deritos, Risolutziones, Lezes e Normas de su tempus de oe, chi sian natzionales o internatzionales;
2.6 de contipizare pro che ponner in totu sa Sardinna su bilinguismu, diat esser a narrer de chistionare duas limbas diferentes – su Sardu e s’Italianu – aggualadas apare; s’Acadèmia est in parre chi su bilinguismu intret:
a) in totu sas iscolas mannas e minores de sa Sardìnna, finas a s’Universidade, diat esser chi su sardu lu ponzan matéria curricolare e limba de comunicatzione e de ufìtziu;
b) in sas assembleas cuncordadas a botatzione, cumente Cussizos comunales, Cussizos provintziales, in su Cussizu rezonale e in àteros cussizos che mèdiu de comunicatzione e de ufìtziu;

c) in sos tribunales, che mèdiu de comunicatzione e de ufìtziu;
d) in sa Crèsia, che mèdiu de comunicatzione e de ufìtziu;
e) in ràdios, TVs e àteros mass media pùbricos, che mèdiu de comunicatzione e de ufìtziu;
f) in àteros logos pùbricos che a càmeras de cumèrtziu, ufìtzios catastales, ispidales, presones e gai sighinde cumente médiu de comunicatzione e de ufìtziu;

2.7 de fagher a manera chi sa Limba sarda la reconnoscan de su totu s’Istadu e s’Unione Europea;
2.8 de fagher a modu chi sa Limba sarda arribet e intret puru aterue foras de Sardinna e la potan istudiare in sas iscolas e in sas universidades de àteros logos inue s’agatan sardos medas;
2.9 de dare a ischire totue de s’Acadèmia.

Art. 4 Sa limba de s’Acadèmia


1 Sa limba ufitziale de s’Acadèmia est su Sardu.
2 Onzi assotziadu de s’Acadèmia podet chistionare, in sas assembleas, in sa bariedade de sa Limba sarda chi cheret, cumente l’ischit issu.
3 Sos documentos ufitziales natzionales de s’Acadèmia sun iscritos in sas duas bariedades de sa Limba sarda; sos chi non sun natzionales, in sa bariedade de su logu inue su documentu l’ iscrien; in logu chi s’agatat a làcana de sas duas bariedades, o in logos foras de Sardinna, sos documentos s’an a iscrier in ambas bariedades.

4 Custa Carta est iscrita in sas duas bariedades de sa Limba sarda e in Limba italiana; a chie cheret la podet furriare in àteras limbas puru e dare a connoscher gasietotu, ma in casu chi b’apat chistione cumandat su chi est iscritu in Sardu e in Italianu; gasietotu pro s’ Autu.

Art. 5 S’intrada a s’ Acadèmia

1 Sun assotziados de s’Acadèmia:
a) sos chi an frimadu s’Àutu de nàschida de su Sòtziu;

b) sos chi, apusti fata sa dimanda pro intrare, acumpanzada dae sa presentada nessi de duos assotziados, los amitit su Cussizu Diretivu o, si si faghet recussu, s’Assemblea de su Sòtziu, bastas chi atzeten s’impinnu pro sas finalidades de s’Acadèmia e chi promitan de sighire su chi narat custa Carta;
c) sos chi, reconnotos chi an fatu cosa de importu mannu pro sa Limba sarda o pro s’Acadèmia, su Cussizu Diretivu, a botu de totus s’ùrtimu unu, los at fatos assotziados onoràrios.
2 A s’assotziadu a nou su Cussizu Diretivu li dat sa tèssera e una còpia de sa Carta de s’Acadèmia;
3 Sos assotziados sun sinzados in su Libru de sos Assotziados, inue deretu su Presidente de s’Acadèmia iscriet sos noos;

4 Sa tèssera si pigat onzi annu e su tantu de pagare lu narat su Cussizu Diretivu cun una dilìbera chi si depet fagher intro de nadale; sa tèssera balet pro totu s’annu infatu.
5 A chie si tèsserat a nou tenet tempus totu s’annu; a chie torrat a tesserare lu faghet intro de prima die de cabidanni e ùrtima die de nadale.

6 Sos assotziados onoràrios retzin sa tèssera de badas; pro s’àteru tenen deritos e doveres che a sos àteros assotziados.

Art. 6 Deritos de sos de su Sòtziu

Sos assotziados tenen deritu:
1 de fagher atividade in s’A- cadèmia, de triballare in sas domos suas e de ponner parre e botu pro totu sos incàrrigos;
2 de tenner donzunu sa còpia de sa Carta de s’Acadèmia;
3 de poder legher sos berbales de sas assembleas e àteros documentos de s’Acadèmia e de retzire sas còpias chi cheren a ispesas issoro;
4 de triballare pro ispragher sa oghe de sas finalidades de s’Acadèmia.

Art. 7 Doveres de sos sòtzius

Sos assotziados tenen su dovere:

1 de respetare sa Carta;
2 de operare cun sas matessi finalidades de s’Acadèmia;
3 de azubentare totu su chi faghet s’Acadèmia;
4 de non fagher nudda chi tochet sa fama e s’onore de s’Acadèmia e de totu sos assotziados.

Art. 8 Acabbu de esser assotziadu

Unu acabbat de esser assotziadu:
1 pro dimissione: in casu gasi s’assotziadu si ch’essit de se dae s’Acadèmia, dàndelu a ischire cun una lìtera iscrita a su Cussizu Diretivu;
2 pro no aer torradu a fagher sa tèssera intro de su tempus suo; 3 pro bogadura: in casu gasi s’assotziadu si ch’essit pro cumandu de su Cussizu
Cussizu Diretivu o, si faghet recussu, de s’Assemblea de su Sòtziu, ca:
a) at lassadu chene fata cosa de importu mannu in s’òbera de bolontariadu de s’Acadèmia;
b) at fatu cosa contras a su chi narat sa Carta prus de una borta.
4 Su Cussizu Diretivu o, si b’at recussu, s’Assemblea de su Sòtziu, che lu podet bogare, bastas chi siat a mazoria.
5 Sos assotziados chi si ch’essin o che los bogan, non tenen deritu a lis torrare su dinare dadu e nemancu a si che leare parte de sos benes de s’Acadèmia.

Art. 9 Triballu de sos Asotziados

1 Su triballu de sos assotziados non si podet pagare de peruna manera, mancu dae chie nd’at tentu benefìssiu;
2 A sos assotziados si podet torrare ebbia su dinare gastadu de beras e documentadu pro carchi triballu, bastas chi si nerzat dae innantis su tantu chi si podet gastare.

Art. 10 Òrganos de s’Acadèmia sun:

1 S’Assemblea de sos Assotziados;
2 Su Cussizu Diretivu;
3 Su Presidente.
Totu sos incàrrigos de s’Acadèmia non sun pagados.

Art. 11 S’Assemblea de sos Assotziados

1 S’Assemblea de sos Assotzia- dos est soberana e la faghen totu sos de su Sòtziu chi an semper pagadu sa tèssera.
2 S’Assemblea la podet reunire su Presidente (art. 13 c.1 lìt. b) o, si non podet issu, su Bitzepresidente o su Cussizu Direttivu o su 20% de totu sos assotziados, cun unu cùmbidu iscritu inue b’apat sa die, s’ora, sa domo e s’argumentu de s’atòbiu, nessi sete dies innanti pro sos atòbios ordinàrios, bìndighi dies innanti pro sos istraordinàrios. Est semper amìtidu su cunvocu in vìdeu- cunferèntzia francu in sos atòbios prevìdidos in su c. 9 chi sighit. S’Assemblea depet, nessi una bia a s’annu, fagher un’atòbiu in praesentia.
3 S’argumentu de s’atòbiu depet esser cussu matessi chi fiat in su cùmbidu mandadu a donzunu.
4 S’Assemblea sortit in:
a) atòbiu ordinàriu
a1) onz’ annu intro de su mese de frearzu de s’annu infatu de su chi si tenet in contu pro aprobare:
a1b) su bilàntzu;
a1c) su bilàntzu preventivu;
a2) onzi tres annos:
a2a) pro narrer su chi cheret fagher s’Acadèmia;
a2b) pro torrare a botare su Cussizu Diretivu, ponende sos suplentes chi dian pigare s’incàrrigu de sos efetivos si calicunu si ch’essit de se o non bi podet prus sortire;
a2c) pro chistionare e aprobare àteros argumentos iscritos in su cùmbidu pro s’atòbiu de cussa die etotu;
a2d) pro aprobare àteros argumentos postos a òrdine de leze;
b) atòbiu istraordinàriu pro aprobare:
b1) cambiamentos in sa Carta;
b2) s’iscontzu de s’Acadèmia.
5 Su chi aprobat s’Assemblea de sos Assotziados balet si
a) in sos atòbios ordinàrios sos chi aproban sun sa majoria de sos chi bi sun; ma chi a sa prima sortida bi nde siat nessi unu in prus de sa metade de totu sos Assotziados, e in sa de duas bi nde siat cantusisiat;
b) in atòbios istraordinàrios, chistionande de:
b1) cambiamentos de sa Carta, s’aprobat a majoria de sos chi bi sun, bastas chi bi siat nessi sa metade e unu de totu sos Assotziados, gasi in su primu atòbiu cumente in su de duos;
b2) iscontzu de s’Acadèmia, sos chi aproban sun nessi tres partes contras a una de totu sos Assotziados, chi siat a su primu atòbiu o chi siat a su de duos.
6 Su de duos atòbios si depet fagher in un’àtera die dae sa de su primu.
7 In calesisiat atòbiu de s’Assemblea de totu sos Assotziados donzunu podet dare petzi unu botu. Cando su cunvocu est fatu in vìdeu- cunferèntzia donzi botassione s’at a fagher a cramada de lùmene, pustis de aer lèzidu su puntu de sa chistione de sa die chi si depet botare.

8 Donzi sòtziu si podet fagher rapresentare dae un’àteru sòtziu pro mèdiu de una dèlega iscrita. Custa dèlega s’at a poder imbiare fintzas in curreu eletrònicu intro sas 2 (duas) oras innanti chi comintzet sa sètzida. Donzi sòtziu at a poder presentare tres dèlegas ebbia.
9 Sas chistiones chi sighin no an a poder esser deliberadas pro vìdeu-cunferèntzia:
a) annou de su Cussizu
b) annou de su Collèziu Sientìficu
c) cando si depet iscontzare s’Acadèmia de su Sardu.

Art. 12 Su Cussizu Diretivu

1 S’Acadèmia la cumandat su Cussizu Diretivu, chi tenet s’incàrrigu pro tres annos e est fatu nessi dae sete cussizeris o prus, botados dae s’Assemblea de sos Assotziados; sos cussizeris si poden fintzas torrare a botare.
2 Su Cussizu Diretivu lu podet sortire su Presidente (art. 13 c. 1 lìt.
a) a) o fintzas su tresunu de sos cussizeris, cun unu cùmbidu iscritu o fax o, si onzi assotziadu lu permitit, cun email, inue b’apat iscritu sa die, s’ora, sa domo e sa chistione de isterrer, dadu nessi sete dies innanti; pro apretu bastan tres dies ebia. In su matessi cùmbidu b’at die e ora de su primu e de su de duos atòbios. Faghet de presidente de s’atòbiu su Presidente de s’Acadèmia etotu o, si non b’est issu, su Bitzepresidente o su cussizeri prus mannu de tempus. Sas dilìberas de su Cussizu Diretivu s’aproban a majoria ma, a su primu atòbiu, balen si b’at unu in prus de sa metade de sos cussizeris e a su de duos no importat cantos sun; si a bortas sos botos essin partzidos paris, cumandat su botu de su Presidente o de su chi lu faghet in cambiu sou. Est amìtidu semper su cunvocu in vìdeu-cunferèntzia. Su cussizu diretivu depet, a donzi modu, fagher un’atòbiu nessi una bia a s’annu in praesentia. Cando s’atòbiu est fatu in vìdeu- cunferèntzia, sa botassione s’at
a fagher po cramada de lùmene, pustis de aer lèzidu su puntu de sa chistione de sa die chi si depet botare.
3 Su Cussizu Diretivu in su primu atòbiu botat:
a) tramesu de sos cussizeris etotu su Presidente e su Bitzepresidente;
b) tra totu sos de su Sòtziu, su Collèziu Sientìficu.

4 In su matessi atòbiu, o in àteros, botat (art. 19 c. 3) su Comitadu de Redatzione e podet dare fintzas àteros incàrrigos.

5 Si a bortas unu cussizeri si ch’essit, intrat unu suplente.
6 Su Cussizu Diretivu cumandat s’Acadèmia, operende e faghende su chi at postu in programa s’Assemblea de sos Assotziados.
A la narrer prus in fine su Cussizu Diretivu

a) azudat, paris cun su Bitzepresidente, a su Presidente in su triballu suo;
b) sighit e mandat ainnantis su tesseramentu;
c) faghet a modu de ispargher totue s’Acadèmia;
d) ordiminzat calesisiat regulamentu de intro;
e) mantenet su libru de sos contos, su de sos verbales de s’Assemblea de sos Assotziados, su de sos verbales de su Cussizu Diretivu e su de sos assotziados, totu firmados. S’intertenet a lassare sos libros a donzi assotziadu chi los cheret bider;

f) iscriet su Bilàntzu (art. 21 c. 1 e 2);
g) amàniat su Bilàntzu de s’annu in fatu (art. 21 c. 3);
h) sortit, cun calesisiat pessone de issu etotu, chene deritu de botu, a sos atòbios de su Collèziu Sientìficu e de su Comitadu de Redatzione.
7 A sos triballos de su Cussizu Direttivu poden sortire, chene deritu de botu, sos de su Collèziu Sientìficu.

Art. 13 Su Presidente

Su Presidente:
1 lu botat su Cussizu Diretivu intro de issu etotu e bogat de conca
a) in su Cussizu Diretivu;
b) in s’Assemblea de sos Assotziados;

c) in su Collèziu Sientìficu;
d) in su primu atòbiu de su Comitadu de Redatzione;
2 cumandat e rapresentat, puru a contu de leze, s’Academia;
3 frimat pro contu de su Sòtziu;

4 leghet in s’Assemblea de su Sòtziu sa Relata de su Cussizu Diretivu;
5 Su triballu de su Presidente non si podet pacare de manera peruna, mancu dae banda de chie nd’at tentu benefìssiu. Si podet solu torrare su tantu chi at gastadu de abberu amostrende documentos de su triballu fatu e non prus de su tantu chi fiat cuncordadu dae innantis de lu fagher.

Art. 14 Su Bitzepresidente

Su Bitzepresidente:
1 triballat paris cun su Presidente e l’azuat in sos atòbios pùbricos de importu;

2 si non b’at su Presidente, lu faghet issu;
3 su Bitzepresidente faghet puru de cassieri. Est pro cussu chi issu:
a) aperit, serrat o faghet àteru in contos correntes de banca o de posta;

b) regollit totu sos intròitos e su chi dan sos tesserados;
c) faghet pagamentos, assentat die pro die sos iscritos de sa contabilidade cumente narat sa leze e tramesu de cussos su libru de sos imbentàrios e su libru de zorronada (art. 23);
d) amàniat sos bilàntzos paris cun su Cussizu Diretivu;
e) iscriet e leghet sa relata finantziària onzi annu in s’Assemblea de sos Assotziados;

f) s’intertenet, si sa leze lu rechedet, a decrarare sas incunzas e a sighire onzi chistione fiscale.
4 Su triballu de su Bitzepresidente non si podet pacare de manera peruna, mancu dae chie nd’at tentu benefìssiu. Si podet solu torrare su tantu gastadu de abberu amostrande documentos de su triballu fatu e non prus de su tantu chi fiat cuncordadu dae innantis de lu fagher.

Art 15 Su Collèziu Sientìficu

1 Su Collèziu Sientìficu pessighit sas finalidades tènnicas e sientìficas a ue s’Acadèmia cheret arribbare, (art. 3 cs. 2.1, 2.2, 2.3, 2.4).
2 Su Collèziu Sientìficu lu botat su Cussizu Diretivu, tra totu sos de s’Acadèmia, chi apan sa connoschèntzia tènnica e sientìfica chi bi cheret po custu triballu.

3 Mantenet s’incàrrigu pro tres annos e bi depen esser nessi sete pessones o fintzas prus.
4 Su Presidente de su Collèziu
Sientìficu est su Presidente de s’ Acadèmia;
5 Su Presidente de su Collèziu Sientìficu sortit su Collèziu (art. 13 c. 1 lìt.c), onzi borta chi, a parre sou, bisonzat.
6 Sa die de su primu atòbiu, su Collèziu Sientìficu botat su Coordinadore e aprobat su pianu de sos triballos; in su matessi atòbiu si poden dare àteros incàrrigos;
7 Sas dilìberas de su Collèziu Sientìficu s’aproban a majoria; in sa prima sortida però bi depet esser nessi unu cussizeri in prus de sa metade de sos de su Collèziu; dae sa de duas sortidas in susu no importat cantos sun; si a bortas torran pari, cumandat su botu de su Presidente.

8 Su Collèziu Sientìficu contipizat e triballat a contu sou. Totu su triballu fatu, innanti de l’amostrare a chiesisiat e de lu bogare a su pùbricu, lu depet aprobare su Cussizu Diretivu.
9 A sos atòbios de su Collèziu Sientìficu poden sortire, chene deritu de botu, puru sos de su Cussizu Diretivu (art. 12 c. 6 lìt. h);
10 Sos de su Collèziu Sientìficu poden sortire, chene deritu de botu, a sos triballos de su Cussizu Diretivu (art. 12 c. 7 ).
11 Sos de su Collèziu poden esser cussizeris de su Diretivu e fintzas Presidente de su Sòtziu.
12 Su triballu de su Collèziu Sientìficu totu cantu, o de unusisiat chi nde faghet parte, non si podet pacare de manera peruna, mancu dae banda de chie nd’at tentu benefìssiu.
Si podet solu torrare su tantu chi unu at gastadu de abberu, amostrende documentos de su triballu fatu e non prus de su tantu chi fiat cuncordadu dae innantis de lu fagher.

Art. 16 Su Coordinadore de su Collèziu Sientìficu

1 Su Coordinadore de su Collèziu Sientìficu depet esser un’assotziadu de s’ Acadèmia e si b’at mèdiu depet esser un’acadèmicu;

2 lu botat su Collèziu Sientìficu in su primu atòbiu.
3 Su chi depet fagher est a sighire su triballu de su Collèziu e a arribare a sas finalidades chi narat s’art. 3 cs. 2.1, 2.2, 2.3, 2.4;

4 Su triballu de su Coordinadore sientìficu non si podet pagare de manera peruna, mancu dae chie nd’at apidu benefìssiu. Si podet torrare ebia su tantu chi at gastadu de abberu, amostrende documentos de su triballu fatu e non prus de su tantu chi fiat cuncordadu dae innantis de lu fagher.

Art. 17 Ateras domos

1 Cumente narat su c. 4 de s’art. 1, s’Acadèmia podet tenner domo in àteros logos.

2 Su ite de bi fagher lu dilìberat su Cussizu Diretivu cun unu regulamentu addatu.

Art. 18 Pubricatziones

1 S’Académia podet pubricare, fintzas cun tìtulos rezistrados in tribunale e in jassu internet, àutos, relatas, documentos, fotografias, roba didàtica, istùdios,
informatziones e chistiones de argumentos culturales, sientìficos e didàticos chi bisonzan pro sas finalidades de sa Carta;
2 Totu su chi si pubricat si depet marcare cun su sinnu de s’Acadèmia, (art. 2 cs. 1 e 2).
3 Nemos podet pubricare a contu suo roba de s’Acadèmia;
4 Po pessighire su chi narat su c. 1 de custu artìculu, si podet fagher unu Comitadu de Redatzione.

Art. 19 Comitadu de Redassione

1 Su Comitadu de Redatzione (dae como innantis C.d.R.) pessighit s’informatzione e sa connoschèntzia, in donzi logu, de sas finalidades de s’Acadèmia e de su triballu tènnicu e sientìficu fatu.
2 Su C.d.R. triballat a contu sou ma pessighinde sas finalidades chi narat custa Carta. Totu su triballu fatu, prima de lu bogare a su pùbricu, lu depet aprobare su Cussizu Diretivu.
3 Su C.d.R. lu botat (art. 12 c. 4) su Cussizu Diretivu tra totu sos de s’Acadèmia, chi apan sa connoschèntzia tènnica chi bi cheret po custu triballu.
4 Mantenet s’incàrrigu pro tres annos; donzunu si podet fintzas torrare a botare.
5 In su C.d.R. b’at unu Diretore chi cumandat e sos collaboradores.
6 A su primu atòbiu, su
C.d.R. botat unu de issos etotu e lu faghet Diretore Responsàbile; custu atòbiu lu reunit su Presidente de su Cussizu Diretivu, a sa manera chi narat s’art. 12 c. 2
e issu etotu faghet de Presidente;

7 Sos àteros atòbios, a pustis su primu, los reunit su Diretore Responsàbile, a sa manera chi narat s’art. 12 c. 2. 12
c. 2.
8 Su C.d.R. podet cuncordare periòdicos de informatzione (c. 2 de custu art. 19).
9 Sas dilìberas de su C.d.R. s’aproban a majoria; in su primu atòbiu però bi depet esser nessi unu cussizeri in prus de sa metade de sos de su C.d.R.; dae su de duos atòbios in susu no importat cantos sun; a botos pari binchet su botu de su Diretore.

10 A sos atòbios de su C.d.R. poden sortire, chena deritu de botu, fintzas sos de su Cossizu Diretivu (art. 12, c. 6, lìt. h).

11 Non si podet leare incàrrigos in
su C.d.R. essende in su Diretivu; a chie retzit su botu pro ambos, tenet su deritu de seberare su chi cheret.
12 Su triballu de
su C.d.R. o de unusisiat chi nde faghet parte non si podet pagare de manera peruna, mancu dae chie nd’at àpidu benefìssiu. Si podet torrare ebbia su tantu chi unu at gastadu de abberu, amostrende documentos de su triballu fatu e non prus de su tantu chi fiat cuncordadu dae innantis de lu fagher.

Art. 20 Sos benes

1 Sos benes de s’Académia sun:
a) sos azudos in contu de benes;
b) intregaduras, donatziones e làssidas da banda de chiesisiat;
c) benes mòbiles e frimos
cuberados e postos in possa cun su supraprus de sos intròitos, ogadas sas ispesas.
2 S’Académia, po poder triballare cumente li dechet po s’importu chi tenet, cùberat sos benes e su dinare chi li bisonzat dae:
a) su de sa tèssera e àteru dinare de sos assotziados;
b) dinare dae chiesisiat;
c) azudu in dinare da banda de s’Istadu, de Entes e de Istitutziones pùbricas;

d) azudu in dinare de Entes pùbricos internatzionales;
e) regalias e lassas postas in testamentu;
f) intròitos de triballos fatos dae s’Acadèmia;
g) intròitos cuberados cun carchi atividade de cumèrtziu de s’Acadèmia.
3 S’Acadèmia depet chistire onzi documentu de donzi intrada, cumente narat custu art. in su c. coladu, cun s’inditu de sos chi an pagadu, si no est chi calicunu cherzat abarrare chene connotu.

Art. 21Bilàntzu e contos

1 Su Cussizu Diretivu faghet su bilàntzu (art. 12 c. 6 lit. f) inue si depen bider, unu po unu, totu sos benes, sas intregaduras e sas lassas chi sun intradas, totu sas trantziduras de dinare, sas bendas e sas còmporas fatas.

2 Su Bilàntzu de un’annu andat dae 1 u de ghennarzu a su 31 de nadale e si depet jugher, intro su mese de frearzu de s’annu in fatu, a s’Assemblea de sos Assotziados, pro l’aprobare (art. 11, 11
c. 4 litt. a1b).
Su Cussizu Diretivu amàniat su bilàntzu po s’annu in fatu e lu depet jugher, intro de su mese de frearzu de cussu annu etotu, a s’Assemblea de totu sos Assotziados, pro l’aprobare (art. 11
c. 4 litt. a1c).

Art. 22 Gastu e sobradura

1 Non si podet fagher perunu gastu e nemancu si podet impinnare unu tantu, si su tantu no est a seguru in podere de s’Acadèmia.
2 Totu su chi sobrat onzi annu, boghèndeche sas ispesas, si depet ponner deretu pro mezorzare totu su triballu de s’Acadèmia, o si podet finas gastare pro intrare in podere de benes mòbiles e frimos, chi poden bisonzare pro pessighire menzus sas finalidades de su Sòtziu.

Art. 23 Sos contos

Sos contos de su Sòtziu depen esser sinzados die po die in su libru de sos benes e in su libru de sos contos e totu, cumente narat sa leze.

Art. 24 Cambiamentos in sa Carta

1 Calesisiat cambiamentu de sa Carta lu podet proponner su Cussizu Diretivu o nessi su 10% de sos de s’Assemblea de sos Assotziados.
2 S’Assemblea de sos Assotziados dilìberat e aprobat a sa manera chi narat s’art. 11 c. 5 lit. b1 de custa Carta etotu.

Art. 25 Iscontzu de s’Académia de su Sardu

1 Sa dimanda de iscontzare s’Académia bisonzu chi la fatzan paris a s’Assemblea de sos Assotziados nessi su 75% de sos assotziados.
2 S’Assemblea de sos Assotziados dilìberat e aprobat a sa manera chi narat s’art. 11 c. 5 lit. b2 de custa Carta etotu.
3 Si a bortas s’Académia s’iscontzat o acabat su triballu o no s’agatat prus, totu sos benes chi sobran a pustis de sos pagamentos, andan a calicunàteru sòtziu chi siat operende in sa matessi atividade.

Art. 26 Regulamentos de intro

Sos Regulamentos de intro los amàniat e lis dat cussideru su Cussizu Diretivu.

Art. 27 Règulas de serrada

1 Pro totu su chi non si mèntuat in custa Carta si ponet fatu a su chi narat su “Còditze Tzivile”, pro su chi pertocat Sòtzios e ativividades de bolontariadu, cumente narat sa leze de s’ 11 de austu 1991 n. 266 e sa leze rezonale de su 13 de cabidanni 1993 n. 39. 39.
2 Po calesisiat chistione de leze intrat su Tribunale de Casteddu.

Sas finalidades nostras

S’iscopu de s’Acadèmia est de fagher òbera de bolontariadu in totu su chi pertocat s’istùdiu e sa chirca de sa Limba sarda, pro sa defesa, s’ispinta, sa connoschèntzia e s’importàntzia sua, ponende a triballare su bonu totu sos assotziados, donzunu su chi podet, chene paga peruna.