Comunicato n 03/2026
Est comintzada sa parte prus de importu de su progetu triennale pomòvidu dae Acadèmia de su Sardu APS e finantziadu dae Fondazione di Sardegna. Cun su lùmene metafòricu <<Su Sardu est in totue-LemONS de bidda in bidda>>, sa prataforma digitale sardu.wiki est su logu de riferimentu tecnològicu pro s’amparu e sa promossione de sa limba sarda in totu sas bariedades de bidda.
S’ispetzifitzidade de su lemONS (acrònimu de Lemàriu ortogràficu normadu de su Sardu) est in sas intrànnias suas: no est unu ditzionàriu impostu dae un’ autoridade, ma unu lemàriu, un’òpera bia chi catàlogat su Sardu in totu sas macrobariedades suas, sutabariedades, formas iscritas e pronùntzias. Dae su Logudoro a su Meilogu, a su Monteacuto, a sa Planarza, a su Màrghine-Costera finas a su Campidanu, colande pro su Nugoresu, sa Baronia e sa Barbaza, donzi bidda impreat unu lèssicu ùnicu chi arriscat de s’ispèrdere si no benit amparadu e cumpartidu.
Cùmbidu a nde fagher parte.
Pro fàghere a manera chi su lemàriu potat espressare deaberu sa boghe de totu sos territòrios, s’Acadèmia de su Sardu pedit a totu sos sardofonos, iscritores, amantiosos e zòvanos curiosos: iscriìde-bos a gratis a sa prataforma Sardu.wiki! Donzunu de nois podet fàghere sa diferèntzia. A nde leare parte est fàtzile: Regìstra-ti a gratis a su Sardu.wiki. Pone sos lemas de bidda o de tzitade tua, e inrìchi-lu cun sas bariedades ortogràficas de bidda tua. Azuda cun sas pronùntzias àudiu, pro lassare a sos eredes de su benidore non solu faeddos iscritos, ma finas sos sonos de sa faeddada nostra.
<<Su Sardu est in totue>> no est un tìtulu ebia, ma una declarada de ideas. Sa limba sarda bivet in sa boghe de chie la faeddat donzi die. Aùni-ti a sa comunidade e azuda a fraigare su prus archìviu digitale mannu de s’identidade nostra.
L’associazione culturale
Acadèmia de su Sardu APS
