Comunicato n 03/2026
Est cumentzada sa parti prus de importu de su progetu triennali promòviu de Acadèmia de su Sardu APS e finantziau de Fondazione di Sardegna. Cun su nòmini metafòricu <<Su Sardu est in totue-LemONS de bidda in bidda>>, sa prataforma digitali sardu.wiki est su logu de arreferimentu tecnològicu po s’amparu e sa promovidura de sa lìngua sarda in totu is bariedadis de bidda.
Sa spetzifitzidadi de su LemONS (acrònimu de Lemàriu ortogràficu normau de su Sardu) est in is intrànnias suas: no est unu ditzionàriu impostu de un’autoridadi, ma unu lemàriu, un’òbera bia chi catàlogat su sardu in totu is macrobariedadis suas, sutabariedadis, formas scritas e pronùntzias. De su Logudoro a su Meilogu, a su Monteacuto, a sa Planàrgia, a su Marghine-Costera finsas a su Campidanu, passendi po su Nugoresu, sa Baronia e sa Brabaxa, dònnia bidda allogat unu lèssicu ùnicu chi megat de si sperdi chi no benit amparau e cumpartziu.
Cumbidu a pigai parti
Po fai a manera chi su lemàriu potzat espressai diaderus is boxis de totu su territòriu, s’Acadèmia de su Sardu pedit a totu is sardofonus, a is scridoris, is amantiosus e a is giòvunus crosidadosus: assentai-sì a gratis a sa prataforma sardu.wiki! Donniunu de nosu podit fai sa diferèntzia. Pigai parti est discansosu: arregistra-tì a gratis in sardu.wiki. Poni is lemas schetus de bidda tua o de tzitadi tua, arrichendi-ddus cun is bariedadis ortogràficas de sa bidda tua. Agiuda cun is pronùntzias àudiu, po intregai a is erederis benidoris no scéti fueddus scritus, ma finsas su sonu schetu de sa fueddada nosta.
«Su Sardu est in totue» no est scéti unu tìtulu, ma una decrarada de ideas. Sa lìngua sarda bivit in sa boxi de chini dda fueddat dònnia dii.
Auni-tì a sa comunidadi e agiuda a fraigai su prus arcivu digitali mannu de s’identidadi nosta.
L’associazione culturale
Acadèmia de su Sardu APS
