Giampiero Marras Zuanne Pedru Marras (Zampa)

G

uanne Pedru Marras-Meloni, connotu cun su nòmini de ‘Zampa’ Marras est famau meda in su mundu de sa cultura sarda, pruschetotu in su mundu de su movimentu linguìsticu sardu e de sa polìtica de su sardismu indipendentista. Fiat filloru de s’indipendentista Antoni Simon Mossa (c.) su fundadori de su ‘neosardismu’ o ‘sardismu indipendentista’ o ‘segundu sardismu’. Difatis at eredau de Simon Mossa totu sa stima po sa Sardìnnia, po sa cultura sarda e po sa Lìngua sarda. At fatu parti de su Partidu Sardu de su 1951 a su 1976 e apustis de su 1984 a su 1994. A sighiri, de su mesi-de-ladàmini de su 1994, est intrau a fai parti de su movimementu polìticu Sardigna Natzione finsas a unus cantu annus a oi candu at detzìdiu de lassai a una parti sa polìtica ativa. 

In su mesi-de-abrili de su 1971 at stantargiau su primu assòtziu culturali po sa defensa, s’avaloramentu e s’afortiamentu de sa Lìngua sarda fueddada e scrita: «S’Iscola Sarda» est a nai sa primu “fundassione èitinu-curturale de sa Nassione Sarda”. S’Iscola Sarda tenit cincu cambas: sa linguìsticu-culturali, sa teatrali, sa de sa mùsica, sa de su Connotu e s’arradiufònica-televisiva. Oindii S’Iscola Sarda sighit sa batalla culturali po sighiri a fai bivi sa Lìngua sarda e in su cumbènniu de Cabuderra “Riflessioni su una standardizzazione moderna e democratica del Sardo” (de su 30 de maju de su 2007) cun d-una lìtera at arrefudau ofitzialmenti sa proposta regionali de Limba Sarda Comuna. Po contras “S’Iscola Sarda” proponit che a ortografia normada un’ortografia pigada inderetura de su sardu imperau in sa Carta de Logu. 

In su 1976, impari a Antonio Lèpori (c.), at stantargiau sa «OSSN» est a nai “Organisassyone Sotzialista Sardìnnya Nassyone” (unu movimentu po sa libertadi e s’indipendèntzia de sa Sardìnnia). 

Zampa Marras fait parti de su sindicau CSS (Cunfederatzioni Sindicali Sarda). Oindii Zampa Marras est impinniau a sterri s’Òbera omnia dedicada a su maistu suu Antoni Simon Mossa. 

Òberas de importu mannu: «Manzanile duminigale in Limba Sarda Nassionale» (programa arradiufònicu in sardu. de su 1976); arrelata in sardu de Zampa Marras in su cumbènniu de Casteddu de su 1982 «La lingua sarda ieri e oggi»; «La lingua nazionale sarda del periodo delle libertà giudicali» (Alfa Editrice).