Acadèmia de su Sardu est nàscïa po amparai, avalorai e afortiai s’imperu fueddau e scritu de sa Lìngua sarda.

Sendi chi po s’Acadèmia sa Lìngua sarda est UNA scéti e, in su matessi tempus, a DUAS CAMBAS (o fueddadas mannas) est a nai, su sardu campidanesu e su sardu logudoresu, po s’assòtziu culturali nostu custas duas macrobariedadis diatòpicas e literàrias depint tenni a pretzisu sa matessi dinnidadi e duncas depint essi cunsideradas sèmpiri in d-unu sètiu de agualàntzia, chena de fai fillus e fillastus.

S’Acadèmia megat de fraigai arrelatas bonas cun su Stadu, sa RAS, sa UE, is Universidadis e is àterus assòtzius culturalis po totu su chi pertocat sa circa scientìfica e sa polìtica linguìstica. In s’interis s’Acadèmia at ativau e megat de sighiri a fai circa scientìfica in calisisiat campu de sa lìngua sarda; cuncordat e proponit ainas scientìficas po chi su sardu tengat sa matessi dinnidadi de is àteras lìnguas natzionalis e duncas potzat tenni:

1) UNU standard a DUAS normas scritas e fueddadas (sa Norma de su sardu campidanesu e sa Norma de su sardu logudoresu);

2) s’Ofìtziu Natzionali de sa Lìngua sarda po spainai cun is cursus de sardu is duas normas scritas e fueddadas de sa Lìngua sarda;

3) s’Ofìtziu po su Tzertificau de su standard a duas normas;

4) s’Atlanti Linguìsticu Sardu;

5) is Ditzionàrius de is biddas e bixinaus e su Ditzionàriu Mannu de sa Lìngua sarda;

6) unu bilinguismu cumpriu cunforma a totu is leis de su stadu e de sa RAS.