Ocannu “Monumentus Abertus” chistionat in sardu! Unu contu girollendi po Casteddu e is prus arrenconis suus eciseris e fueddendi totu in sa lìngua nosta. Gràtzias a s’assòtziu Acadèmia de su Sardu APS, difatis, eus apariciau duas passilladas in sardu de s’apendìtziu de sa Marina a is arrugas de Casteddu de Susu: unu biaxi stòricu e literàriu in is bias, is monumentus e is naradas de una tzitadi chi tenit unas cantu identidadis chi nd’aproillant de totu su Mediterràneu.
Ant a essi is sonus e is fueddus de sa varianti nosta, su campidanesu, a s’acumpangiai a giru e a si fai scoberri is stòrias de su logu e de sa genti de custa tzitadi: balla ca est una sperièntzia chi no fait a si perdi!
Sàbudu e domìnigu inghitzaus a is 4.00 de a merii e dd’acabbaus a is 8.00.
Sa passillada at a durai unas 2 oras e mesu.
Sa ghia nosta est Michela Foddis (ghia turìstica regionali e de Acadèmia de su Sardu APS)
Su tanti prus mannu de genti chi ndi podeus pigai po dònnia passillada est de 40 personis.
Sa ghia at a fueddai totu in sardu campidanesu
Sa cambarada s’at a atobiai in s’arruga Roma, acanta a s’intrada de su comunu: Palàtziu Bacaredda. Apustis de is saludus e de sa presentada, eus a incarrerai peri su Stradoni de su portu (o Pratza de su mercau, imoi Largu Càrulu Felici) faci a sa Pratza de Santu Càrulu (Yenne) po contai de sa stàtua de s’urrei, de sa Marina e de sa pratza etotu. Agoa nc’eus a artziai in sa Costa (arruga Mannu) aundi s’eus a firmai ananti de sa crèsia de Sant’Antoni de su Fogu; furriaus ande s’obeliscu de sa Pratza de is Màrturus po lompi abàsciu de su Bastioni de Saint Remy e, torrendi agoa po s’arruga Mazzini, nd’aproillaus a s’apendìtziu de Casteddu de Susu de sa Porta de is Lionis. Ingunis eus a passai in s’arruga de s’Universidadi, sa Turri de s’Elefanti, sa Crèsia de sa Santa Gruxi, arruga Strinta, arruga de Santu Giosepi, arruga de is Fossas, sa Seu, su Comunu Bèciu, su Palàtziu Règiu, sa Pratzita Mùndula, su Palàtziu Onnis e dd’eus a acabbai faci a sa Turri de Santu Francau.
