Tazenda

(1988)

I

n su 1988 Gigi Camedda, Gino Marielli e Andrea Parodi ndi pesant su progetu Tazenda, una de is primus e de is prus trumas connotas de rock ètnicu. In su primu discu insoru s’intendit luegus unu sonu annoadori po mori de s’impreu de su campionamentu de sonus de canna, cantu a tenore e àterus strumentus chi marcant unu tràgiu ùnicu. In su 1990 arribbat fama e sorti cun sa cantzoni Carrasecare chi bincit su cuncursu de su programa TV “Gran Premio”. S’annu infatu andant a su Festival de Sanremo cun sa cantzoni Spunta la luna dal monte, impari a Pierangelo Bertoli e in su 1992, apustis de ai arriciu su discu de òru, e de un’annu de girus e àterus prèmius, torrant a su Festival de Sanremo cun sa cantzoni Pitzinnos in sa gherra, totu cantada in sardu, cun d-unu imbalapipius de acabbu scritu de Fabrizio De Andrè. Arribbat su segundu discu de òru e unu muntoni de prèmius in prus de fai faina manna in su palcu e in TV. In is annus infatu s’allònghiat su listàrgiu de is collaboratzionis de importu: Morandi, De André, Ramazzotti, Renga, Turci, Inti-Illimani, Maria Carta, e a.n. andendi a sonai in Cànada, U.S.A., Cuba, Austràlia, Bèlgiu, Slovènia, Inghilterra e Svìtzera. In su 1997 Andrea Parodi si-ndi andat de sa truma, chi sighit comenti a duetu. Funt annus de collaboratzionis cun boxis noas (Claudia Crabuzza, Gian Mario Masu) e de sperimentatzioni finsas a lompi a su 2006, candu s’aberit unu tretu nou cun s’intrada de Beppe Dettori a sa boxi e sa collaboratzioni cun Ramazzotti, Renga, Carta e Grignani. In su 2012, apustis de s’imprenta de su de noi discus Ottantotto, Beppe Dettori lassat sa truma e arribbat s’aligheresu Nicola Nite. Su tretu nou biit sa collaboratzioni cun Mogol e àterus artistas famaus e, in su 2016, bessit su discu S’istoria cun sa Sony, un’arregorta de cantzonis po afestai is 30 annus de carriera de sa truma. Su 5 de maju de su 2020 su vìdeu nou A nos bier arregollit crìticas positivas meda, amostendi chi sa truma est ancora biatza e bona a fai mùsica noa.