Tazenda

In su 1988 Gigi Camedda, Gino Marielli e Andrea Parodi nde bogan a pizu su progetu Tazenda, una de sas primas e de sas prus connotas de rock ètnicu. In su primu discu issoro s’intendet luego unu sonu annoadore pro more de s’impreu de su campionamentu de sonos de canna, cantu a tenore e àteros istrumentos chi marcan unu trazu ùnicu. In su 1990 arribat fama e sorte cun sa cantone Carrasecare chi binchet su cuncursu de su progama TV “Gran Premio”.

S’annu infatu andan a su Festival de Sanremo cun sa cantone Spunta la luna dal monte, paris cun Pierangelo Bertoli e in su 1992, pustis de àere retzidu su discu de oro, e de un’annu de ziros e àteros prèmios, torran a su Festival de Sanremo cun sa cantone Pitzinnos in sa gherra, totu cantada in sardu, cun d-unu imbala-imbala de serrada iscritu dae Fabrizio De Andrè. In prus de fàghere faina manna in su palcu e in TV arribat su segundu discu de oro e unu muntone de prèmios. In sos annos chi sighin s’illongat sa lista de sos azudos de importu: Morandi, De Andrè, Ramazzotti, Renga, Turci, Inti-Illimani, Maria Carta, e g.s. andande a sonare in Cànada, U.S.A., Cuba, Austràlia, Bèlgiu, Islovènia, Inghilterra e Isvìtzera. In su 1997 Andrea Parodi si-nd’andat dae sa truma, chi sighit comente a duetu.

Sun annos de azudos cun boghes noas (Claudia Crabuzza, Gian Mario Masu) e de isperimentos fintzas a lòmpere a su 2006, cando s’aberit una caminera noa cun s’intrada de Beppe Dettori e sa boghe e s’azudu cun Ramazzotti, Renga, Carta e Grignani. In su 2012, pustis de s’imprenta de su discu nou Ottantotto, Beppe Dettori lassat sa truma e arribat s’aligheresu Nicola Nite.

Su tretu nou bidet s’azudu cun Mogol e àteros artistas famados e, in su 2016, essit su discu S’istoria cun sa Sony, una regorta de cantones pro fàghere festa pro sos 30 annos de carriera de sa truma. Su 5 de maju de su 2020 su vìdeu nou A nos bier retzit crìticas positivas meda, mustrande chi sa truma est ancora bia e bona pro fàghere mùsica noa.