Ratapignatta

Is Ratapignata nascint in su 1998 in Casteddu. Est una truma formada de 10 artistas chi benint de unas cantu sperièntzias musicalis e chi cumpartzint su prexeri po su ska, su reggae e su rocksteady. Sa mùsica insoru est un’amesturu de stilis, arrìtimus e sonus sèmpiri cuncordaus cun fueddus e rimas in lìngua sarda scritus de Lele (Emanuele) Pittoni, e chi fueddant de is malis, is problemas e is prexus de sa vida de dònnia dii. In 10 annus de trabballu ant portau sa mùsica insoru in Sardìnnia e Itàlia aberrendi finsas is cuntzertus de is NewYork Ska Jazz Ensemble, Amparanaoia, Linea 77, Folkbbestia, Banda Bassotti… . Su primu discu Sighi Sighi est de su 2005 e su de duus discus est Son’e Magasinu, ambaduus prodùsius de issus etotu, in custu discu ddoi funt 10 cantzonis e unu remix de su dj/cumposidori eletrònicu Franziscu Medda (Arrogalla).

Sighint a fai sèmpiri cuntzertus meda pighendi parti a festival, sonendi cun is Marlene Kunz e pighendi parti a unu volumi monogràficu (Atrus annus de su 2011), a s’arregorta de s’Unioni Sarda asuba de su rock in Sardìnnia. In su 2012 bessit Su Bandu. In su 2014 arricint s’arremoni coment’e Best Live Act a su Suns Europe. In su 2015 bessit Oru Siguru arregistrau in su Sonusville de Silìcua de Enrico Rocca e Willi Cuccu. Sa truma si sciùsciat in su 2018.

Come desideri visualizzare il sito web ?

Comenti ddu bolis biri su giassu web?