Franco Madau

Nàscïu in Tuili (CA) in su 1953, est connotu meda comenti a sonadori e autori de cantzonis ispiradas a su connotu sardu. Disterrat in Milanu in su 1969 e, apustis, movit e trabballat in Sesto San Giovanni comenti a operaju in sa sienda Breda. S’interessat luegus de mùsica e intrat in d-una truma de mùsica ligera e fait finsas cabaret, intrendi in s’ambienti discogràficu in su 1973.

Apustis de ai fatu su serbìtziu militari in Nàpoli, fùrriat a Sesto San Giovanni e incumentzat a scriri is primus cantzonis in sardu. Cantat in su Teatro Uomo de Milanu is cantzonis operajas suas e arregistrat, gràtzias a Michele Straniero, su primu nastru de cantzonis Nato per disgrazia a primavera, un’ala in sardu e s’àtera in italianu. In su 1976 arregistrat po sa Ariston, asuta de sa dirigidura de Moni Ovadia, La scomunica; in su 1977 A morti sa tirannia. Fait una tournée in Sardìnnia portendi in giru su spetàculu Cantende s’istoria nostra (1978), is cantzonis funt imprentadas in su primu LP de sa Madau Dischi, fundada de issu etotu, bincit po duus annus paris (1981/82) su “Premio della critica discografica” po su setori folk. Apustis de is discus Ottana (1980), A pagu a pagu (1982), S’ebra maha (1985) e Sabor’e gazzosa (1987), si candidat a sa Camera po su PCI.

Cun s’agiudu de sa tzitadi sua imprentat su discu S’ottu miu (1989) e in su matessi tretu bincit su cuncursu “Folk d’autore” de Torinu cun sa cantzoni Babbaiola, intregada a Nelson Mandela. In su mentris chi est imprentendi àterus discus s’interessat a su teatru e a sa literadura. In su 1996 trabballat impari a s’atori e regista Piero Marcialis, scriendi is balladas de is spetàculus Sa dì de s’acciappa e Emilio Lussu e s’incurat, impari a su giorronalista e scridori Paolo Pillonca, de s’imprenta de is poesias de Peppino Mereu.

De annus meda Madau, a prus de sighiri su trabballu suu de cantautori, aparìciat in s’ortu suu de Tuili un’arròliu de artistas sardus, totu aunius de s’amori po sa Sardìnnia e po s’arti sarda, in dònnia forma sua.

Come desideri visualizzare il sito web ?

Comenti ddu bolis biri su giassu web?