Franco Madau

Nàschidu in Tuili (CA) in su 1953, est connotu meda comente sonadore e autore de cantones mòvidas dae ispirassione de su connotu sardu. Si-che andat a Milanu in su 1969 e, apustis movet e tribàlliat in Sesto San Giovanni comente oberaju in sa sienda Breda. S’interessat luego de mùsica e intrat in d-una truma de mùsica lizera e faghet fintzas cabaret, intrande de gai in s’ambiente discogràficu in su 1973.

Pustis de àere fatu su servìssiu militare in Nàpoli, fùrriat a Sesto San Giovanni e incumintzat a iscrìere sas primas cantones in sardu. Cantat in su Teatro Uomo de Milanu sas cantones oberajas suas e registrat, gràssias a Michele Straniero, su primu nastru de cantones Nato per disgrazia a primavera, a un’ala in sardu e a s’àtera in italianu. In su 1976 registrat pro s’Ariston, suta de sa dirigidura de Moni Ovadia, La Scomunica; in su 1977 A morti sa tirannia. Faghet una tournée in Sardìnnia leànde-che in ziru s’ispetàculu Cantende s’istoria nostra (1978), sas cantones sun imprentadas in su primu LP dae sa Madau Dischi, fundada dae issu etotu, binchet, pro duos annos a fila (1981/82) su “Premio della critica discografica” pro su setore folk. Apustis de sos discos Ottana (1980), A pagu a pagu (1982), S’ebra maha (1985) e Sabor’e gazzosa (1987), si candidat a sa Càmera cun su PCI.

Cun s’azudu de sa tzitade sua imprentat su discu S’ottu miu (1989) e in su matessi tempus binchet su cuncursu “Folk d’autore” de Torinu cun sa cantone Babbaiola, intregada a Nelson Mandela. In su mentres chi est imprendende àteros discos s’interessat de teatru e literadura. In su 1996 tribàlliat paris a s’atore e regista Piero Marcialis, iscriende sas balladas de sos ispetàculos Sa dì de s’acciappa e Emilio Lussu e s’incurat, paris a su zornalista e iscritore Pàule Pillonca, de s’imprenta de sas poesias de Peppinu Mereu.

Dae annos meda Madau, a prus de sighire su tribàlliu sou de cantautore, amanizat in s’ortu sou de Tuili unu ròlliu de artistas sardos, totu aunidos dae s’amore pro sa Sardìnnia e pro s’arte sarda, in donzi froma sua.

Come desideri visualizzare il sito web ?

Comente lu cheres bìdere su zassu web?