Dr Drer & Crc Posse

Est una truma casteddaja nàscïa in su 1991, est de is primus posse sardu-italianas. Sa mùsica insoru est un’amesturu de rap, reggae e sonus de su connotu. A incumintzu sa truma fut formada de 3 arrapadoris (Miali Atzori-dr Drer Màuru Mou e Silvestru Ziccardi) e unu dj (Lisandru Pintus-AlexP). Faineris meda in Sardìnnia in is manifestadas in su primu tretu de is annus ’90. Arregordaus su cuntzertu stòricu de su 2001 in s’Universidadi De Casteddu cun is Arratapignata po finantziai su biaxi a Genova po su G8.

Avatu de Sega Sa Cadena (cd) de su 2008 sa truma càmbiat formatzioni: si-ndi andat Silvestru e intrat Giorgia Loi chi cantàt in is Tanca Ruja e in is Andira, Giuanni Siccardi, boxi, e Arricardu Dessì (Frichi) coment’e bassista elètricu. Sa truma produsit duus cd (In sa Terra Mia in su 2010 e s’annu infatu Cosa Bella Frisca). Pigant parti a unus cantu festival traballendi impari a àterus musicistas, no scéti sardus: Frantziscu Capuzzi, imbentori de is eletroneddas, Mondo Usai (chi fait e torrat a imbentai strumentus sardus de su connotu), Andria Pisu (launeddas), Tore Agus (sonetu).

Connotus in Itàlia e foras de Itàlia, in su 2019 ant bintu su SUNS festival de Ùdini e in su pròpiu annu su LIET. In su 2013 cun sa cantzoni Casteddu 43 firmant sa sigla de su bellu documentàriu RAI Cagliari 1943. Quando scappavamo con cappotto sul pigiama. Cantant pruschetotu sa Sardìnnia, sa cultura e is problemas cosa sua: tzerachias militaris, gherras, disterru, deretus tzivilis, lìngua…