Dr Drer & Crc Posse

Est una truma casteddaja nàschida in su 1991, est de sos primos posse sardu-italianu. Sa mùsica issoro est una mistura de rap reggae e sonos de su connotu. A s’incomintzu sa truma fit fromada dae tres arrapadores (Miali Atzori-dr Drer, Màuru Mou e Silvestru Ziccardi) e unu dj (Lisandru Pintus-AlexP). Faghineris meda in Sardìnnia in sas manifestassiones in sa prima parte de sos annos ’90. Amentamus su cuntzertu istòricu de su 2001 in s’Universidade de Casteddu con sos Arratapignata pro finantziare su biazu a Genova pro su G8.

Pustis de Sega Sa Cadena (cd) de su 2008 sa truma mudat formassione: si-nd’andat Silvestru e intrat Giorgia Loi chi cantat in sa Tanca Ruja e in sos Andira, Giuanni Siccardi boghe e Ricardu Dessì (Frichi) comente bassista elètricu. Sa truma at produidu duos cd (In sa Terra Mia in su 2010 e s’annu infatu Cosa Bella Frisca). Lean parte a unos festival triballiande paris cun àteros musicistas, non solu sardos: Frantziscu Capuzzi, imbentore de sas eletroneddas, Mondo Usai (chi faghet e imbentat istrumentos sardos de su connotu), Andria Pisu (trubeddas), Tore Agus (sonete).

Connotos in totue fintzas fora de Itàlia, in su 2019 an bìnchidu su SUNS festival de Udine e in su matessi annu su LIET. In su 2013 cun sa cantone Casteddu 43 friman sa sigla de su bellu dochimentàriu RAI Cagliari 1943. Quando scappavano con cappotto sul pigiama. Cantan pruscheàteru sa Sardìnnia, sa cultura e sos problemas suos: terachias militares, gherras, disterru, deretos tziviles, limba…