Benito Urgu e i Barrittas

(Aristanis, 1939)

C

antautori, atori còmicu de cabaret, de televisioni e de tzìnema.
Cumentzat a giòvunu in sa truma I nuraghi sonendi e cantendi me is aposentus po baddai e me is pratzas cantzonis chi fiant a sa moda e cantzonis scritas de issus etotu a comenti Su twist ‘e Giuannica, o Cambale twist, chi arriciint apretziamentus mannus in Sardìnnia e finsas in terramanna, gràtzias a sa RAI.
Lassat sa truma musicali e cumentzat a traballai cun d-unu tzircu sardu, su Circo Armando, aundi imparat tempus e segretus de su teatru e de sa scena.
In su 1962, impari cun Frantziscu Salis (ghitarra), Antoni Albano (ghitarra), Nello Cocco (bateria), Guidu Cocco (teclada) e Antoni Salis (ghitarra bàscia) ndi stantàrgiat sa truma Barrittas chi tenit luegus grandus apretziamentus.
Sa truma traballat meda in totu s’Itàlia a comenti e truma beat.
In is annus ’70 cumentzat sa carriera de cabaret de Benito, chi dd’at a portai po bint’annus e prus in giru po totu sa Sardìnnia cun spetàculus de “variedadi” cun personàgius, espressadas, struturas gramaticalis e pronùntzias amesturendi sardu e italianu regionali, pigadas de sa vida de dònnia dii e postas apari po stroci is Sardus de manera spassiosa: Marianna e il marokino, Visitors, Polvere di stelle, Un giorno in pretura, Chi l’ha visto, Ciccitta è facendo salciccia, Tuttourgu, Latte e cozze, Bugie, Tonteddu…
Dònnia spetàculu est arregistrau in musicascitas chi su pùbricu circat a pedra furriada po si-ddu torrai a ascurtai in domu.
De is annus ’90 e finsas a oi Benito sartat torra su mari e andat a traballai cun produtzionis natzionalis a sa RAI e àterus programas natzionalis cun atoris e autoris a comenti e Piero Chiambretti (Prove tecniche di trasmissione, L’inviato speciale, Markette – tutto fa brodo in TV), Toto Cutugno (Piacere RaiUno), Ambra Angiolini (Carosello), Giorgio Panariello (Torno Sabato), Nino Frassica (Suonare Stella), Carlo Conti (I migliori anni) e àterus.
Fait s’atori in medas films, sit-com e teleromanzus natzionalis. Sua est puru sa cumèdia musicali Boghes de domo, po RAITre.