Rossella Faa

Cantanti, cumponidora, cantastòrias, atora in is spetàculus-cuntzertu, contat in sardu e italianu cun grandu teatralidadi e presèntzia scènica, contus spassiosus meda de fèminas de is biddas. Dd’acumpàngiant su contrabassista Nicola Cossu e su ghitarreri Giacomo Deiana. Sa cantzoni Cixiri, chi at fatu connosci is Balentes est òpera sua puru. At trabballau cun artistas che Piero Marras e Elena Ledda. Is protagonistas de Rossella Faa funt fèminas chi nant ca funt o macas o intrendi in edadi e duncas bagadias po sceberu o po pagu sorti mancai. De is cantzonis-interpretatzionis prus connotas arremonaus: Malloreddus cun bagna, Cannaca Macca, Bella Bella, Ta Bellu su Domminigu.

Cantat e contat is chistionis acapiadas a sa vida de dònnia dii in is milli bisuras e frùngias suas cun grandu originalidadi chi sprèviant e spàssiant su spetadori. Fait parti de sa cumpangia Teatro del Segno e est autora de mùsicas de scena a prus de essi atora. Traballat impari finsas cun sa cumpangia Tragodia. Masuddesa, contat: “Cussu cabu de giossu chi cun sa cultura e lìngua stravanada cosa sua, a pipia m’at donau cosa meda, sighit a donai grandus ideas a sa pantasia cosa mia”, e sighit “a 17 annus fiat abarrada spantada e amainada de sa bossanova, de cussus arrìtimus e sonus de sa cultura de un’àteru sud de su mundu“.

In is spetàculus e discus ddoi est unu bellu amesturu de jazz, salsa, pop, reggae, bossanova e sonus de su mesuderràneu e sardus chi creant efetus musicalis stravanaus.

Come desideri visualizzare il sito web ?