Randagiu Sardu

(Seddori, 2008)

R

andàgiu sardu (Carlo Concu) est un’artista Raggae-hip hop de Seddori. Su primu vìdeu chi pubricat est de su 2008, S’Arrespiru, cun sa collaboratzioni de Quilo. Sighint, de su 2008 a su 2012, àterus 3 cd: Io randagiu sardu, Shimi follow me e Rappamuffin. Is cantzonis, pruschetotu in sardu, contant sa vida cun ironia e impìnniu sotziali e funt stèrrias in d-una genia musicali chi amesturat hip hop, ragamuffin, blues. Is prus cantzonis connotas funt Sa Battalla (asuba de sa Batalla de Seddori de su 1409), Fibai e Tessi, Pedronamì Terra. Fait cuntzertus medas po is festas sardas e in su 2012 cun Quilo pigat parti a su Suns Festival. Sèmpiri cun Quilo fait sa dance hall in medas tzìrculus sardus. In su 2015 bessit su vìdeu Countryman, un’innu a sa vida de sartu. In su 2016 bessit su vìdeu Xelu, girau in is dunas de Piscinas. Torrat in su 2019 cun su discu Sobi, anca pigant parti àterus artistas sardus connotus. Sa cantzoni est acumpangiada de unu vìdeu anca est biatzu su spìritu “new roots e ragga”. In su pròpiu annu fait unu vìdeu in sa bia (street video) Pappa Faa, anca amostat abilèntzia manigendi rimas in sardu. Sa Ghitarra est de su 2020.