Eduardo Blasco Ferrer

Eduardo Blasco Ferrer

 

(Bartzellona, 1956 – Bastia, 2017)

Su linguista cadalanu Eduardo Blasco Ferrer est nàscïu in Bartzellona in Cadalùnnia su 15 de su mesi de Làmpadas de su 1956 e est mortu in Bastia in Còssiga su 12 de gennàrgiu de su 2017. Apustis de ai lassau sa Cadalùnnia po lompi a traballai e a studiai in Germània che a studianti-traballadori, at cumentzau a studiai filologia romanza e linguìstica romanza candu s’est assentau e at pigau parti a su Cursu de làurea de Linguìstica romanza in s’Universidadi de Erlangen in su 1976 e sèmpiri in custa universidadi s’est laureau in su 1981 in Linguìstica romanza, lompendi finsas a fai unu Dotorau de circa in Linguìstica romanza cun Heinrich Kuen in su 1982. Apustis de ai pigau sa làurea e su dotorau de circa in Germània est lòmpiu in Sardinnia aundi at fatu su ligidori de Lìngua cadalana in s’Universidadi de Casteddu. A cumentzai de su 1993 in s’Universidadi de Casteddu at otentu s’incàrrigu de Professori de Stòria de sa Lìngua italiana e apustis, a cumentzai de su 1996, s’incàrrigu de professori de Linguìstica sarda in sa Facultadi de Scièntzias de sa Formadura. At aguantau custus duus incàrrigus finsas a candu est mortu. De su 2001 finsas a su 2008 fiat puru su Dirigidori de su Maistaxu universidàriu de livellu II in Acostamentus interdisciplinàrius a sa didàtica de su sardu. At adelantau su tretu teòricu giai inghitzau de M.L. Wagner. Cojau in Sardìnnia cun d-una fèmina sarda, at tentu duas fillas. At otentu àterus incàrrigus puru po fai su professori de Linguistica romanza, Filologia romanza e Glotologia in is universidadis de Tàtari (in su 1986), Bonn (in su 1987-88), Frorèntzia (1988) e Mònacu de Baviera (de su 1989 a su 1991). Est famau meda in campu linguìsticu po is circas scientìficas asuba de sa Lìngua sarda e sa didàtica de su sardu, ma finsas puru po su chi pertocat su cadalanu, su spanniolu, su ladinu e s’italianu. In is ùrtimus annus at pigau parti a su dibatu asuba de su standard de sa Lìngua sarda apoderendi s’idea de unu standard de su sardu a duas normas. Comenti ativista-defensadori de is deretus de is sardòfonus at pigau parti puru a su movimentu po sa Lìngua sarda e su bilinguismu in Sardìnnia. Su 2 de gennàrgiu de su 2009 impari a àterus coranta sòtzius e sòtzias fundadoras at stantargiau s’assòtziu culturali Acadèmia de su Sardu. 

In prus at fatu parti de: Istituto per l’Alto Adige; Società di Linguistica Italiana; Società Italiana di Glottologia; Centro di Studi Filologici e Linguistici Siciliani; Associazione di Storici della Lingua Italiana; Verband der deutschen Italianisten; Deutsch-Katalanische Gesellschaft; Sociedad de Lingüística Española; Associació Internacional de Llengua i Literatura Catalanes; Association Internatzionale d’Etudes Occitanes. 

A sighiri fiat puru: coordinadori de sa Setzioni Linguìstica stòrica in su Cungressu internazionali de Linguìstica Romanza de Santu Jacu de Compostela impari a Yakov Malkiel e Heinz Jürgen Wolf; dirigidori de sa cannaca Stùdius de Linguìstica sarda, impari a Heinz Jürgen Wolf; codirigidori de su Tzentru Wagner po sa Circa stòricu-linguìstica asuba de su sardu (Nùgoro); dirigidori arresponsàbili de sa cannaca “Samanunga” cun Peter Koch, John A. Smith e Shiegeaki Sugeta; sòtziu (1999-2004) de Advisory Board de Romance Philology (Berkeley). 

Is prus òberas de importu de Blasco Ferrer: 

Grammatica storica del catalano e dei suoi dialetti con speciale riguardo all’algherese, Tübingen, G. Narr, c1984; La lingua sarda contemporanea: grammatica del logudorese e del campidanese: norma e varietá dell’uso: sintesi storica, Cagliari, Della Torre, c1986; Storia linguistica della Sardegna, Tübingen, Niemeyer, 1984; Le parlate dell’alta Ogliastra: analisi dialettologica: saggio di storia linguistica e culturale, Cagliari, Della Torre, 1988; Ello, ellus: grammatica sarda, Nuoro, Poliedro, c1994; La lingua nel tempo: variazione e cambiamento in latino, italiano e sardo, Cagliari, CUEC, 1995; Breve corso di linguistica italiana: con facsimili, edizione e commento d’un testo quattrocentesco ad uso di seminari ed esercitazioni, Cagliari, CUEC, 1996; Pro domo: grammatica essenziale della lingua sarda, Cagliari, Condaghes, 1998; Italiano e tedesco: un confronto linguistico, Torino, Paravia scriptorium, c1999; Italiano, sardo e lingue moderne a scuola, Milano, F. Angeli, 2003; Crestomazia sarda dei primi secoli, Ilisso, 2003; Tecniche di Apprendimento e di Insegnamento del sardo, Della Torre, 2005; Storia della lingua sarda, Cagliari, CUEC, 2009; Sardo e italiano a confronto, CUEC (scritu impari a Giorgia Ingrassia) 2007; Glossario di Linguistica sarda, CUEC (scritu impari a Giorgia Ingrassia) 2008; Storia della lingua sarda, CUEC (scritu impari a Giorgia Ingrassia) 2009; Paleosardo. Le radici linguistiche della Sardegna neolitica, Berlin, De Gruyter, 2010; Corso di linguistica sarda e romanza, Franco Cesati Editore, 2016;
Manuale di linguistica sarda, (scritu impari a Peter Koch, Daniela Marzo et al.), Berlin, De Gruyter, 2017.

 

Cumpartzi

Share on facebook
Facebook
Share on whatsapp
WhatsApp
Share on email
Email

Unu progetu cun su contribudu de sa Fondazione di Sardegna

Còmpora su lìburu de
SU SARDU, LÌNGUA
DE EUROPA