Antonio Gramsci

(Abas, 1891 – Roma, 1937)

E

st connotu mescamente pro esser unu de sos fundadores de su partidu comunista italianu (PCd’I) in su 1921. Paga zente est a connoschèntzia chi su comunista Gramsci fut meda amantiosu de sa limba sarda. Est issu su primu chi nde at bogadu a pizu sa chistione de sa limba sarda, a comintzu cando fut unu zòvanu indipendentista e posca a mannu cando fut unu comunista famadu. Si podet cussiderare comente unu de sos babbos de su movimentu linguìsticu sardu. Gramsci connoschiat su sardu e lu impreaiat in momentos e logos divrèscios cun àteros sardos. Est Gramsci etotu chi contat s’impreu de su sardu a Torinu cun sos sordados de sa Brigata Tataresa chi si fut postu a difendere sos obreris dae sos militares mandados pro frimare sa manifestassione de sos obreris. E fintzas in Roma cando in d-una setzione de su partidu comunista Gramsci e sos cumpanzos sardos de sa matessi setzione chistionaian in sardu pro si faghere a comprendere dae sos carabineris, chi bardiaian sa setzione, ca fin totu de raighina sarda. 

Nàschidu in Abas in su 1891 est cussideradu intre sos filòsofos marcsistas chi aiat prus àlchida in su mundu de su sèculu XX. Dae su 1913 a su 1921 at fatu  parte de su partidu sotzialista italianu, ma pustis de su boltulu in Rùssia de su 1917 s’est acostadu a sas bideas de sos bolscevicos sovièticos, faghinde nàschere, paris a Bordiga, su partidu comunista italianu a Livornu in su cungressu de su 1921. Sende unu de sos  antifascistas prus de importu, l’an impresonadu in su 1926 in sa presone de Turi ca Mussolini lu cussideraiat unu perìgulu pro sa ditadura fascista, pro Mussolini fut unu inimigu meda perigulosu pro sas bideas suas. Famadu pro custas òberas: Líteras dae sa presone (1926-1937) e Cuadernos de sa presone (comintzados in s’8 freàrzu de su 1929 e cumpridu in s’austu de su 1935).
Inoghe in custa rassìnnia curtza amentamus s’iscritu prus de importu pro su movimentu linguisticu sardu est a nàrrere sa lìtera de Teresina de su 26 de martu de su 1927, cussiderada finas a oe su manifestu de su movimentu linguìsticu sardu in cantu Gramsci at ilgiaridu s’importu de fundamentu de s’educassione bilìngua pro sos piseddos, in italianu ma fintzas in sardu, inue Gramsci narat in manera crara: (…) devi scrivermi a lungo intorno ai tuoi bambini, se hai tempo, o almeno farmi scrivere da Carlo o da Grazietta. Franco mi pare molto vispo e intelligente: penso che parli gia correttamente. In che lingua parla? Spero che lo lascerete parlare in sardo e non gli darete dei dispiaceri a questo proposito. È stato un errore per me non aver lasciato che Edmea, da bimbetta, parlasse liberamente in sardo. Ciò ha nociuto alla sua formazione intellettuale e ha messo una camicia di forza alla sua fantasia. Non devi fare questo errore con i tuoi bambini, Intanto il sardo non è un dialetto ma una lingua a sé, quantunque non abbia una grande letteratura, ed è bene che i bambini imparino più lingue, se possibile (…).
Illiberadu dae presone de Turi in su 1937, est mortu in Roma su 27 de abrile de su matessi annu.