Piero Marras

Piero Marras (Piero Salis a s’anàgrafi) nàscit in Nùgoro in su 1949. Est arreconnotu coment’e anticipadori e esponenti mannu de sa mùsica ètnica sarda. Inghitzat a sonai in Nùgoro cun trumas de su logu e sighit, cun àterus grupus, in Casteddu de su 1967. Est su 1978 s’annu de su batiari discogràficu suu cun su discu Fuori campo, imprentau de EMI. Cun sa matessi domu discogràfica bessit, in su 1980, Stazzi uniti, chi intrat luegus in sa classìfica tenendi sorti manna.

Apustis incarrerat unu tretu de produsidura manna in lìngua sarda, prena de arriferimentus a personàgius, sonus, arrìtimus e atmosferas de sa cultura isulana, totu insertau fitianamenti aìnturu de una bisura “cantautorali”. Marras etotu si biit “che a sirboni chi fragat is arrèxinis de su connotu e de sa stòria de una terra imbriaga de mari e de birdi”. In su 1985, cun Abbardente, chi est unu de is primus esemprus de “world music mediterrànea”, inghitzat unu caminu chi sighit, duus annus apustis, cun Funtanafrisca po lompi, in su 1988, a su primu discu suu, Piero Marras in concerto.

Su discu infatu est Tumbu, prenu de strinas e de fueddus asuba de is prus chistionis chi tenit a coru Marras: sa paxi e s’amori, sa gherra e sa tìrria. In su 1997 torrat a imprentai Fuori campo, su primu discu suu, e s’annu afatanti sonat in Cuba po s’arrassìnnia Ichnos. Funt annus chi scriit finsas po àterus cantantis (Andrea Bocelli) e tenit collaboratzionis internatzionalis (Dionne Warwick). In su 2001 bessit su de otu discus, In su cuile ‘e s’anima e, avatu de duus annus de prèmius e arreconnoscimentus de importu, s’arregorta de cantzonis in lìngua sarda B’est. In su pròpiu annu, su 2003, in Sulmona, arricit su “Premio Internazionale Ignazio Silone” po “su valori culturali mannu de is cantzonis suas in lìngua sarda”.

L’ultimo capo indiano est de su 2004, unu discu chi arregollit totu is cantzonis prus famadas de su 1978 a su 1982. De su 2005 finsas a su 2018 at imprentau àterus 5 discus: Pieromarras Live 1 e 2, Ali di stracci, Storie Liberate, Istorias.

Come desideri visualizzare il sito web ?