Melchiorre Murenu

(Macumere, 1803 – 1854)

A

pustis de chent’annos dae sa morte de Murenu sa poesia sua nde-l’an torrada a bogare a pizu pro li dare balore. Non s’ischit cale fit cosa sua e cale nono, ischimus ca sa funtana dae inue nde benin sas novas sun totu de bìdere una pro una. Bi fin pagu autògrafos e pagu imprentas fitianas de s’autore e a si fidare de sa bona memòria populare est un’arriscu mannu comente su matessi pro cussa manuscrita. Susu sa manera sua de poetare b’at unu muntone de paristòrias e imbòligos de contàssias. Su primu a nde dare contu de cust’òmine fit Juanne Spano. Issu nos narat chi fit nàschidu in su mese-de-martu de su 1803 dae Batista Ledda Murenu e dae Angela Pala. Aiat una bona memòria, li bastiat de intèndere una bia ebia una cosa pro la torrare a nàrrere in cobertantza. Aiat sentidu malu pro sos bosincos e aiat connotu fintzas sa presone: cantaiat a tota die. Sa gara sua fit cussa de cantare e improvisare. Non bidiat e pro cussu non connoschiat sa bellesa de su chelu isteddadu. Sos frades fin andados teracos anzenos e issu aiat bìvidu cun sa mama betza e viuda. Issu fit religiosu, aiat àpidu una briga poètica cun Maloccu de Fonne, andaiat a sas garas populares, non podiat bìdere sos feudatàrios mannos, aiat agabbadu sa vida pro su zispetu impreadu contra a issu pro neghe de sos versos suos. L’aian mortu su 21 de su mese-de-Santuaine de su 1854. Sa pigota, maladia mala, l’aiat arruinadu sos ogros, si non fit istadu pro cussu ite totu aiat pòtidu fàghere? Pustis de sa morte nde-l’aian segadu sa conca e mustraiat unu cherbeddu mannu. Meritaiat chi esseren tentu cura de su chisinu de su corpus sou in d-una tumba. Diat èssere de importu a regollire totu sas òberas suas pro li dare totu su mereschimentu chi li pertocat. Dae s’Archivu de Istadu de Casteddu leamus àteras ischedas biogràficas: andàt a Sune pro agatare sa sorre, aiat àpidu una cuntierra cun su preìderu de sa bidda, don Tavera, l’aian impresonadu pro s’afrontu, sa gherra contra a sos bosincos, sa poberesa sua, s’amparu de su cresiàsticu Gattu e gai sighinde. Sas poesias suas nos dan su dispraghere de su poeta in manera prus crara de su chi sos àteros an nadu: Deo, Melchioro Murenu, / possedo tantos affannos: / dae pizzinnu ‘e tres annos, / pro mia crudele azzotta, / un’infettu ‘e pigotta / sa vista mi nd’hat leadu (…) restande poveru e zegu / senz’isperanzia nessuna; / senza benes de fortuna / poberu e disamparadu.
B’at medas teorias susu sa morte de cust’òmine: sas duas chi an prus balore sun:

1) Sa prima nos narat chi che-lu aian betadu in sa pèntuma de Santa Rughe pro zispetu. Fortzis sun istados sos bosincos arrennegados pro sos versos contra a sas brutesas de sa bidda issoro. 

2) Sa segunda est chi l’esseret mortu unu tataresu proite in sa poesia sa dinda troppu fantastica aiat fatu ofesa a sa fiza. 

Menzus est a iscrier unos versos de custa poesia pro fàghere bìdere cantu custa punghet.

DINDA TROPPU FANTASTICA

Dinda, troppu fantastica in sas pumas,
confusa ses de tanta fantasia;
e-i sa genitora maladia
est fattu tou, mancari presumas.

Ca ses macca e non ischis cantu faltat
sa chi possedis de presunzione;
cungregada est cun issa in unione,
dogni meritu bonu si che appaltat;
su difettu maternu est chi t’assaltat
in su mezus fiore ‘e pizzinnia.

Sa fantasia vana est in sas maccas,
sos fumos in su poveru arricchidu;
pro cussu las has postas in olvidu
sas costrintas, mischinas e fiaccas;
pro esser assistida cun teraccas
tenes una superba bramosia.

Troppu tenes superbia e fervore;
sa boria si ti legget in su fronte.
Ma Deus tenet sole in s’orizonte
pro distruer a tempus su lentore;
inue b’hat de poveros sudore,
sa sienda s’iscazat che ‘iddia […].