Duo Puggioni

Giovanni Puggioni (Berchidda, 1942)
Anna Maria Puggioni (Berchidda, 1946)

G

iuanni e Anna Maria Puggioni funt duus fradis berchiddesus chi ant eredau de sa mama insoru Paolina Canu s’impèllida e su talentu po su “Cantu a ghitarra”. Anna Maria, maista elementari cantat e Giuanni, infirmeri, sonat sa ghitarra.
Cumentzant sa carriera in is annus ’70 cantendi in Tèmpiu. Sighendi a cantai in calincun’arràdiu locali is fradis cumentzant a si fai connosci de prus, finas a su mesi de martzu 1982 candu, cumbidaus a cantai in d-unu cuntzertu de mùsica sarda a su tzinema Ariston de Aristanis (aundi ddoi fiant cantadoris famaus comenti a Toninu Canu, Giusepi Chelo, Màriu Firinaiu, su ghitarrista Aldu Cabizza e su sonetista Pepinu Pippia), in mes’ora de cantada arrennescint a fai amachiai su pùbricu.
De sa dii su “Duo Puggioni” bessit famau in totu sa Sardìnnia. Cantat in televisioni e in giru po totu s’ìsula.
Is spetàculus insoru funt sèmpiri prenus de genti e pruschetotu de giòvunus. Bessint a fitianu in televisioni e custu ddus agiudat a afortiai s’apretziamentu de sa loba de cantantis.
Tenint una discografia chi no finit prus: de “Sardegna tra favola e realtà” de su 1981 finsas a “Maria Reina” chi fait parti de sa loba de CD “Dami sa manu”, pubricau de l’Unione Sarda in su 2021.
Sa boxi de Anna Maria est una boxi firma, segura e beni manigiada cun d-unu siddu ermosu e caraterìsticu de sa Sardìnnia. Giuanni est unu ghitarrista abistu e spertu, amantiosu de sa mùsica sarda e de melodias antigas o particularis.
Unu contu longu 25 annus, truncau de una maladia rara, chi s’est sdorrobada una de is prus boxis bellas de sa stòria de su cantu sardu, sa de Anna Maria.