Maria Luisa Congiu

Maria Luisa Congiu

 

(Roma, 1973)

N

aschet in terramanna dae babbu sardu, disterradu pro more de su tribàlliu, e mama romana, cun raighinas sardas. At sèmpere àpidu una istima manna pro sa Sardìnnia, zai chi a 18 annos detzidit de torrare a Ulìana, sa bidda de su babbu.
In su 1992 si cojat cun Pascualinu Puligheddu, artista geniosu, sonadore, componidore e ispertu de sonos. E pròpiu Pascualinu etotu faghet nàschere su “Duo di Oliena”, truma chi at a atràere su pùbricu sardu pro medas annos. Sèmpere Pascualinu at a èssere su prus cumpanzu fidele de Maria Luisa pro sos trint’annos de mùsica chi an a sighire. Maria Luisa s’imerghet in s’istùdiu de sa limba, de sa cultura e de s’identidade sarda, apoderènde-si bene in sas bariedades limbìsticas ulianesa e logudoresa. Istùdiat a fundu, mancare  no las  iscat faeddare, sas faeddadas gadduresas e campidanesas.
Su mundu de sa poesia improvisada, su cantu a Tenore, sas usàntzias e sos ballos, sa connoschèntzia de sas cantones populares de sa Sardìnnia – de sas cantones religiosas fintzas a su cantu a ghiterra – sun sos fundamentos de s’istùdiu de Maria Luisa.
Dae annos meda at una postura de primore in su mundu musicale sardu. Sos cuntzertos sun apretziados meda siat pro su programa, pro s’originalidade e pro sa scenografia e siat proite chircan de avalorare su tribàlliu de sos Sardos, siat in sa mùsica, siat in s’artesania, o calisisiat cosa o idea chi siat “Made in Sardinia”.
Sa discografia comintzat in su 1999 cun d-una musicascita subra sos cantos de su connotu de Sardìnnia. A oe at 13 CD, cun duas dòpias e duas regortas.
Dae medas annos est fatende fintzas cursos privados in sas Iscolas tzìvicas de mùsica, cun prozetos chi balorizen sa Limba sarda, sa cultura e s’identidade de Sardìnnia.
In su 2021 rezit su Prèmiu “Maria Carta”, chi Maria Luisa at chèfidu dedicare a Pascualinu Puligheddu, isposu e cumpanzu de una vida, mortu in su 2020 po more de su CoViD-19 e chi at acumpanzadu a Maria Luisa pro trint’annos de mùsica umpare. 

Cumpartzi

Share on facebook
Facebook
Share on whatsapp
WhatsApp
Share on email
Email

Unu progetu cun su contribudu de sa Fondazione di Sardegna

Còmpora su lìburu de
SU SARDU, LÌNGUA
DE EUROPA