S’Acadèmia de su Sardu est nàschida pro amparare, abalorare e afortigare s’impreu faeddadu e iscritu de sa Limba sarda.

Sende chi pro s’Acadèmia sa Limba est UNA ebia e, a su matessi tempus, a DUAS CAMBAS (o faeddadas mannas), est a nàrrere su sardu campidanesu e su sardu logudoresu, pro s’assòtziu culturale nostru custas duas macrobariedades diatòpicas e literàrias depen àere in contu sa matessi dinnidade e duncas depen èssere cunsideradas sèmpere in d-un’assètiu de paridade, chena fàghere fizos e fizastros.

S’Acadèmia pensat de fraigare relatas bonas cun s’Istadu, sa RAS, sa UE, sas Universidades e sos àteros assòtzios culturales pro totu su chi pertocat sa chirca iscientìfica e sa polìtica linguìstica. Istantonis s’Acadèmia s’est mòvida e pensat de sighire a fàghere chircas iscientìficas in calesisiat campu de sa limba sarda, cuncordat e avansat ainas iscientìficas pro chi su sardu apat sa matessi dinnidade de sas àteras limbas nassionales e duncas potat àere:

1) UNU standard a DUAS normas iscritas e faeddadas (sa Norma de su sardu campidanesu e sa Norma de su sardu logudoresu);

2) S’Ufìssiu Nassionale de sa Limba sarda pro mandare addenanti cursos de sardu de sas duas normas iscritas e faeddadas de sa Limba sarda;

3) s’Ufìssiu pro su Tzertificadu de su standard a duas normas;

4) s’Atlante Linguìsticu Sardu;

5) sos Ditzionàrios de sas biddas e bighinados e su Ditzionàriu Mannu de sa limba sarda;

6) unu bilinguismu fatu cunfroma a totu sas lezes de s’istadu e de sa RAS.